Gapu iti panangbigbig ti lokal a gobierno iti Vintar kadagiti Overseas Filipino Workers (OFWs), babaen iti panangidaulo ni Mayor Richard Agregado Degala, agtultuloy dagiti programa a mangmangted iti tulong kadagiti repatriated and distressed OFWs. Daytoy ket babaen iti pannakailatang ti pondo a manamnama a makapalag-an iti kasasaad dagitoy.
Manipud idi Mayo 5, 2026, addan innem (6) nga OFW ti nagbalin a benepisaryo ti programa, ket lima (5) kadakuada ti nagawid manipud sadiay Middle East.
Kadagiti OFW a napilitan a nagsubli manipud ballasiw-taaw gapu kadagiti di-napakpakadaan a pasamak ken inpaayan ti LGU iti agdagup iti duapulo a ribu a pisos (Php 20,000.00) kas tulong pinansiyal. Daytoy a kantidad ket naituding a kas puunan iti pangrugian a pagbiagan wenno livelihood project, a mabalin a makatulong nga in-inut a mangpatalged iti kasasaad ti pamilia.
Malaksid iti daytoy nga inisyatibo, nabiit pay a nangipaay manen ti LGU iti nayun a tulong-pinansyal kadagiti OFW, nangruna kadagiti naapektaran iti agtultuloy a krisis sadiay Middle East. Adu kadagitoy a trabahador ti naawanan iti panggedan ken nagkurang iti nasapulan, gapuna a biglaan ti panagawidda.
Gapu iti kastoy a kasasaad, agtultuloy ti pannakapabileg dagiti OFW babaen kadagiti livelihood trainings a pakasursurwan dagitoy a mangpapigsa iti panagnegosyo. Inpanamnama ti ama ti ili ti suportana kadakuada ket agtultuloy dagiti programa para iti pagkasapulanda.
Dagitoy a ganetget ti mangiparangarang iti dedikasyon ti LGU-Vintar iti “responsive governance and social responsibility”, nangnangruna iti daytoy a panawen ti krisis. Agtultuloy ti panangitag-ay ti kabibiangan dagiti OFW, a mabigbig a dakkel ti naitulongda kadagiti komunidadda ken iti pagilian.
